Abian da Katapulta Tour Gipuzkoa 2025, musika eta arte eszenikoen programa

Katapulta Tour Gipuzkoa musikako eta formatu txikiko arte eszenikoetako programa da, eta Kutxa Fundazioak eta Gipuzkoako Foru Aldundiaren Kultura, Lankidetza, Gazteria eta Kirol Departamentuak bultzatzen dute, eta Buenawista Prolleckziom’s -ek koordinatzen du.

Proposamenak 2024ko azaroaren 8tik abenduaren 2ra bitartean aurkeztu beharko dira:

 IZENA EMAN HEMEN

Helburuak

• Musikaren eta arte eszenikoen esparruan Gipuzkoako talentuak balioestea eta bultzatzea – bereziki gazteei dagokienez–.
• Gipuzkoako eszena dinamizatzen laguntzea, klubak eta antolatzaileak babestuz.
• Prestakuntzaren eta saiakuntzaren aldeko apustua egitea, profesionalizazio handiagoa lortzeko bide gisa

Hautatutako proiektuei honako hauek eskainiko zaizkie:

• Lau emanaldi Gipuzkoako hainbat espaziotan edo jaialdietan, horietako bat Kutxa Fundazioaren Kluba aretoan.
• 500 euro garbiko konpentsazio ekonomiko bat emanaldi bakoitzeko. (kontratazio kostua aparte). 
• Artistaren edo proiektuaren promozio bideo bat grabatzea.
• Kutxa Fundazioak Tabakaleran dituen instalazioetan entsegu espazio partekatuak doan erabiltzea, erabilgarritasunaren arabera.
• Komunikazioari eta sustapenari, eszenografiari, produkzioari, ekonomiari eta fiskalitateari buruzko prestakuntza programa bat.

Bestalde, deialdian izena eman duten proiektu guztiei doan parte hartzeko aukera emango zaie aipatutako prestakuntza programan.

Prentsa-oharra

‘Artebidea’ programaren baitako proiektua 

Artebidea Kutxa Fundazioak talentu artistikoa sustatu eta babestea helburu duen programa bat da, artistek banakako eta taldeko ezagutzaren sortzaile gisa egiten duten lanari prestigioa emateko asmoa duena. Eta lan hori sozializatuz egiten du, pentsamendu kritikoa eta artearen begirada anitza eta zabalagoa garatzeko. 

Artebidea programaren baitan, bederatzi proiektu anitz aurki daitezke eta horietako bat da ‘Katapulta Tour Gipuzkoa’ zikloa. Guztien artean desberdintasunak nabariak badira ere, helburu amankomun bat partekatzen dute: arteek, humanitateek eta kulturak ezagutzaren eraikuntzan egiten duten ekarpenari balioa ematea.

Artebidea programa, konkretuki, 2024-2030 Plan Estrategiko berriaren baitako Ezagutza biziz lan-lerroan txertatzen da. Ezagutzaren kultura sustatzea du helburu, jendea egungo erronka eta aukeretara hurbiltzeko, eta horrela gizartea eraldatzeko prozesuak bultzatu eta eraikitzeko.