Gipuzkoako Ahotsak: 9 kontzertu lurraldeko musika-talentua sustatzeko

• Ziklo berria urria eta abendua bitartean egingo da Kutxa Fundazioa Kluban, Bidean Produkzioak-en laguntzarekin.
• Taldeen hautaketa hainbat adierazletan oinarritu da, hala nola musikaren kalitatean, hizkuntzan edo genero berdintasunean.

Kutxa Fundazioak ‘Gipuzkoako Ahotsak’ abiatu du, Gipuzkoako musika sorkuntzaren aniztasunari ahotsa emango dion musika zikloa. Ekimena urria eta abendua bitartean egingo da, eta 8 kontzertu bikoitz eta banakako 1 izango ditu, guztiak tokiko taldeenak. ‘Gipuzkoako Ahotsak’ lurraldeko talentu berri eta finkatua babesteko eta ikusarazteko plataforma gisa aurkezten da.

Ziklo honen helburua beren berezitasun eta sormenagatik egiteko, ulertzeko eta izateko modu berriak proposatzen dituzten ahotsei espazio bat eskaintzea da. Musikaren bidez, artista eta sortzaileek ezarritako arauak desafiatzen dituzte, eta urrunago begiratzeko inspirazioa ematen digute, gizarte irekiagoa, inklusiboagoa eta toleranteagoa sustatuz.

‘Gipuzkoako Ahotsak’ osatuko duten taldeen hautaketa proposamenen kalitatea eta aniztasuna bermatzen duten funtsezko adierazle batzuen arabera egin da. Adierazle horien artean dago musikaren kalitatea, hain zuzen ere proiektu bakoitzak maila artistiko altua duela bermatzeko. Gainera, artisten profesionaltasuna, iraunkortasuna eta ibilbidea, eta musikaren panoraman aktibo mantentzeko duten gaitasuna baloratu dira. 

Era berean, genero-berdintasuna funtsezko irizpidea izan da, ordezkaritza orekatua eta askotarikoa ziurtatuz, baita proposamenen originaltasuna eta estiloa ere. Beste faktore batzuk ere izan dituzte kontuan, hala nola taldeek jaso duten kritika eta aintzatespena, baita Gipuzkoan izan duten parte-hartzea ere, ingurunearekiko lotura eta garapen kulturalarekiko konpromisoa erakutsiz.

Bidai musikal bat Gipuzkoan barrena

Gipuzkoako Ahotsak’ ekimenerako hautatutako taldeek tokiko musikaren aniztasuna eta kalitatea irudikatzen dute, estilo eta proposamen berritzaile ugari eskainiz. Urrian, azaroan eta abenduan zehar, beren sormen eta talentuagatik nabarmentzen diren artista berri eta finkatuen emanaldiak izango dira zikloan. 

Programa

• Urriak 5: Antuxuna eta Gilda
• Urriak 12: Zahra Moreno eta Ayvee
• Urriak 19: Eraul
• Urriak 25: Eneritz Furyak eta Hatxe
• Urriak 26: Postal Kolekzionistak eta Aria
• Urriak 31: Sara Mansilla eta Nuria Culla
• Azaroak 22: Mark Duti eta Letagin
• Azaroak 30: Peachy Joke eta Ander Zubillaga
• Abenduak 6: Ke Lepo eta Alai

Kontzertu guztiak Kutxa Fundazioa Kluban izango dira 21:00etan.

Prentsa-oharra deskargatu

‘Artebidea’ programaren baitako proiektua 

Artebidea Kutxa Fundazioak talentu artistikoa sustatu eta babestea helburu duen programa bat da, artistek banakako eta taldeko ezagutzaren sortzaile gisa egiten duten lanari prestigioa emateko asmoa duena. Eta lan hori sozializatuz egiten du, pentsamendu kritikoa eta artearen begirada anitza eta zabalagoa garatzeko. 

Artebidea programaren baitan, bederatzi proiektu anitz aurki daitezke eta horietako bat da ‘Gipuzkoako Ahotsak’ zikloa. Guztien artean desberdintasunak nabariak badira ere, helburu amankomun bat partekatzen dute: arteek, humanitateek eta kulturak ezagutzaren eraikuntzan egiten duten ekarpenari balioa ematea.

Artebidea programa, konkretuki, 2024-2030 Plan Estrategiko berriaren baitako Ezagutza biziz lan-lerroan txertatzen da. Ezagutzaren kultura sustatzea du helburu, jendea egungo erronka eta aukeretara hurbiltzeko, eta horrela gizartea eraldatzeko prozesuak bultzatu eta eraikitzeko.