Kutxa Fundazioaren bultzada Gipuzkoako talentu gazteari

Lurralde kultuago, sortzaileago, bidezkoago eta jasangarriago bati laguntzeko asmoz, Kutxa Fundazioak hainbat proiektu bultzatzen ditu zenbait arlotan (kulturan, jasangarritasunean, hezkuntza-berrikuntzan, ezagutzaren sorkuntzan, …) nabarmentzen diren gazteak aintzatetsi eta bultzatzeko.

Gizartearekiko eta ingurumenarekiko konpromisoa

Kutxa Fundazioak hainbat ekimen garatu ditu, lanaren eta dedikazioaren bidez beren ingurunean aldaketa esanguratsuak bultzatzen dituzten gazteak saritu eta laguntzeko helburuarekin. Proiektu horietako bat Inspira Gazteak Sariak da, gizarte, ingurumen eta berrikuntzarekin duten konpromisoagatik Gipuzkoako gazteei ematen zaizkien sariak. Sari horiek urtero deitzen dira, eta gazteen ibilbidea saritzeaz gain, dagozkien ekintza-arloetan erreferente eta lider izateko duten gaitasuna ere saritzen dute. Inspira Gazteak Sarien hurrengo ediziorako izen-emateak 2025eko urtarrilean egin ahal izango dira.

Prestakuntza eta mentorizazioa: etorkizuneko liderrak ahaldunduz

Gazteak saritzeaz gain, Kutxa Fundazioak prestakuntza eta beharrezko tresnak eskaintzen dizkie bakoitzak bere ibilbidean hazten jarrai dezan. Gazte Ekoliderrak bezalako ekimenen helburua jasangarritasunean eta lidergoan heztea da, egungo ingurumen eta gizarte-erronkei aurre egiteko paper aktiboa izan dezaten. Proiektu honek aldaketen lekuko baino gehiago izan nahi duten gazteengan jartzen du arreta, benetako eraldaketa-eragileak izan daitezen.

Arteei, Kultura Sortzaileari eta Tokiko Modari laguntzea

Eremu honetan Sorlekua Mentoretza da beste programa garrantzitsu bat: prestakuntza eta laguntza ekonomikoa eskaintzen dizkie gazteen kultura- eta sormen-proiektuei. Ekimen honen helburua da proiektuen kudeaketa, bideragarritasuna eta eragina hobetzea, arreta berezia jarriz ekonomia zirkularra eta jasangarritasuna sustatzen dituztenei, bai eta arazo sozialak ikusarazten dituztenei eta gazteentzat kezkabide direnei ere. 

Kutxa Fundazioak konpromiso sendoa du tokiko modaren sektorearekin eta kultura-proiektu berritzaileekin ere; hori dela eta, Sorlekua proiektuaren barruan, tokiko moda-lehiaketa bati esker, diseinatzaile gazteek beren bildumak aurkeztu ahal izaten dituzte ospe handiko ekitaldi batean, hala nola Cristobal Balenciaga Museoko desfilean. Ekimen honek goraka doan talentua nabarmentzen du eta jasangarritasuna sustatzen du modaren bidez, sormena praktika arduratsuekin lotuz.

Arte Ederren esparruan, Artea Abian sortzen ari diren artistei laguntza ematen dien plataforma bat da, eta San Telmo Museoarekin lankidetzan beren obraren monografia bat aurkezteko aukera ematen die. Ekimen honek beren ibilbide profesionalaren lehen etapetan dauden artisten ikusgarritasuna eta aintzatespena errazten du, tokiko eszena artistikoaren garapenari lagunduz. 

Eta Gipuzkoako Foru Aldundiarekin lankidetzan, Kutxa Fundazioa-Gordailua bekak (30.000 euro eta 12.000 franko suitzarrez hornitua) Arte Ederren eta Kultur Ondasunen Kontserbazio-Zaharberritzearen arloan bikaintasunean prestatzea sustatzen du, jasangarritasunaren ikuspegitik. 

Musika, arte eszenikoak eta literatura bultzatzea

Musika da Kutxa Fundazioaren proiektuetan funtsezko beste zutabeetako bat. Katapulta Tour Gipuzkoa bezalako ekimenen bidez, Gipuzkoako musika-talentua sustatzen eta balioesten du Fundazioak. Programa honek prestakuntza, emanaldiak eta musika-banaketa barne hartzen ditu tokiko artistak bultzatzeko, bai musikaren esparruan, bai arte eszenikoetan. Lurraldean zehar 65 emanaldi eginez, Gipuzkoako kultura-eszenaren dinamizazioa sustatzen du proiektuak, tokian tokiko klubei eta antolatzaileei lagunduz.

Gainera, Gipuzkoako Ahotsak kontzertu-ziklo bat da, lurraldeko talentu musikala, sortzen ari dena nahiz finkatua, sustatu eta ikusaraztea helburu duena. Ekimen honek musika-aniztasunaren eta gizarteratzearen aldeko apustua egiten du, musika eta artea egiteko modu berriak proposatzen dituzten ahotsei leku eginez.

Kutxa Fundazioak musika-genero eta -estilo berriak aztertzeko plataforma bat ere eskaintzen du, musika elektronikoa naturarekin eta teknologiarekin uztartzen duen Natura Elektronikoa zikloak erakusten duen bezala. Horrelako ekimenek musika garaikidearen mugak aztertu eta publikoari soinu-esperientzia berriak eskaintzea bilatzen dute.

Eta Bizi ala Iraun iraganaren eta orainaren artean elkarrizketatzen diren kontzertuen zikloa da, benetakotasunaren, gure nortasuna bilatu eta balioestearen aldeko oihua, sustraietara eta tokiko erreferenteak, soinu berrienekin nahasten direnak, bilatzera egindako bidaia. Eta Ganbera Musikako Talentu Berriak eta Tokiko Talentua Jazzaldia ganbera-musikan eta jazzean talentu gaztea sustatu nahi duten beste bi ziklo dira.

Kutxa Fundazioak konpromiso sendoa du literaturarekin eta liburuaren balio-katea garatzearekin ere. Kutxa Fundazioa Donostia eta Irun Literatura Sariak konpromiso horren erakusgarri dira, Gipuzkoan literatura-sorkuntza sustatuz eta ardatza talentu gaztean jarriz. Sari hauek kultura idatziaren garrantzia nabarmentzen dute eta Gipuzkoaren aurrerabidea indartzen dute bertako idazleei emandako laguntzaren bidez.

Gipuzkoaren etorkizunerako kultura eta sormena 

Oro har, Kutxa Fundazioaren ekintzek Gipuzkoako gazteak hainbat diziplinatan garatzeko eta gizarteari ekarpen esanguratsua egiteko gune bat eskaintzea dute helburu. Musika, moda, arte eszeniko, literatura eta jasangarritasunari buruzko proiektuen bitartez, etorkizuneko talentu gazteentzako plataforma sendo bat eraikitzen ari da Fundazioa.

Gizartea eraldatzeko une erabakigarrian, aldaketarako eragile izateko jarrera hartzen du Kutxa Fundazioak, Gipuzkoa kultuagoa, sortzaileagoa eta bere ingurunearekin konprometituagoa sustatuz eta gazteak ahaldunduz etorkizuneko liderrak izan daitezen.