Miquel Navarro. Irudizko arkeologia

MIQUEL NAVARRO

Irudizko arkeologia 

2017ko otsailaren 17tik maiatzaren 21era

Komisarioa: Dolores Durán Úcar

Miquel Navarro Mislatan jaio zen, Valentzian, eta bertan bizi da eta lan egiten du gaur egun. Haurtzaroko esperientziek eta jolasek, baita jaio eta hazi zeneko inguruneak –natura, baratzea eta arkitektura tradizionala alde batetik, eta industria-mundua, bere fabrikak, bideak edo trenak, zein Valentzia hiri handiaren aurkikuntza, bestetik– bere ondorengo bizitza eta sortze-jarduera baldintzatu dute.

Valentziako San Carlos Arte Ederren Eskolan ikasi ostean, marrazketari eta pinturari eskaini zion bere lehenengo etapa. 1970eko hamarkada hasieran eskulturari ekin zion, eta orduan eraiki zituen lehenengo hiriak, buztinarekin, jatorrietara eramaten gaituen material teluriko eta magiko horrekin. Geroago metalak erabiltzen hasi zen –zinka, burdina eta aluminioa, batik bat–, modernotasunaren eta gizarte industrialaren erreferentzia argi gisa.

Miquel Navarroren hiriak pieza kopuru handi samar batez osatuta daude, lurraldean zehar hedatu eta haren jabe egiten diren ehunka unitatez; hala, piezaz pieza, auzoz auzo, guztia hartzen dute: etxeak, eraikinak, plazak, dorreak, fabrikak, errepideak, aireportuak, ibilgailuak, intsektuak, harresiak... bolumen oinarrizkoak edo eraldatuak, taldekatuta, interakzioan eta elkar konektatuta, obra unitario bat osatzeko. Hiri horietako hiru ikusiko ditugu erakusketa honetan: La Ciutat (Hiria, 1984-1985), Ciudad roja (Hiri gorria, 1994-1995) eta Entre muros (Harresi artean, 2000).

Modu horizontalean zabaltzen diren eskulturak dira, baina haietan elementu bertikala gailentzen da; etxe-orratz taldeak multzoaren erdialdean, obeliskoak, piramideak… botere sinbolo gisa nabarmentzen direnak, baina, bestetik, gizakiaren bakardadeari ere erreferentzia egiten diotenak eta, azken batean, existentziari buruz gogoeta egitera eramaten gaituztenak.

Totem moduan, nabarmentzekoa da erakusketan Placón, 3,5 metroko garaierako eskultura bat, aluminio trinkoz eginikoa, boteretsua, irmoa, mehatxatzailea eta, aldi berean, babeslea, eskultorearen obrak hain berezko duen dualtasunari jarraiki.

Miquel Navarrok gogoetarako euskarri gisa erabiltzen dituen lan- edo bidaia-koadernoek eta akademia eta arkeologia gogorarazten diguten buztinaz eginiko eskultura txiki sorta batek osatzen dute ikuspegi hori eta, aldi berean, eskultorearen lantegia aurkezten digute, egiazko sormen- eta esperimentazio-laborategi bat. Miquel Navarro bere pentsamenduarekin, sentimenduarekin eta eskuekin fantasiaren eta errealitatearen artean kokatzen diren paisaiak sortzen dituen poeta da.

Argazkia: Juantxo Egaña

Miquel Navarro 1945eko irailaren 29an jaio zen, Mislatan, Valentzia hiriaren ondoko herri batean, eta gaur egun bertan bizi eta lan egiten du.

1964tik 1968ra ikasketak egin zituen Valentziako Arte Ederren Goi Eskolan, eskulturako espezialitatean, baina garai hartan, marrazten eta margotzen jarduten zen, gehienbat.

70eko hamarraldiaren hasieran, artistak buru-belarri ekin zion eskulturari. 1973an, bere Hirietako lehena sortu zuen, pieza txiki askok osatutako konposizioak –oinarrizko edo eraldatutako bolumenak, taldekatzen, elkarrekin erlazionatzen eta lotzen direnak–, lurzoruan zuzenean zabaltzen direnak, hartatik bereizteko oinarririk gabe, lurraldea bereganatuz. Hasiera batean, terrakotaz egiten zituen, eta gero zinka, aluminioa edo brontzea bezalako metalak sartzen joan zen. Hiriak, irudimenezko arkeologia horiek, oinarrizko elementu bat dira eskultorearen sormenean. Haren lanaren ezaugarri nagusia, izan ere, paisaia eskultorikoaren birsorkuntza da, hiria izanik gai esanguratsuena.

Bakarkako lehen erakusketa 1972an egin zuen, Oviedon. Hurrengo urteetan, besteak beste, Madrilgo Buades eta Fenando Vijande galerietan edo Sevillako Joana de Aizpuru galerian egin zituen erakusketak. Hasiera hartan, oso garrantzitsua izan zen harentzat New Images from Spain erakusketan parte hartzea. Erakusketa hura New Yorkeko The Solomon R. Guggenheim Museumen egin zen, Margit Rowell komisarioa zela, 1980ko udaberrian, eta funtsezkoa izan zen artista nazioartean ezagutzera emateko.

1986an, Kultura eta Kirol Ministerioak emandako Arte Plastikoen Sari Nazionala eskuratu zuen; urte berean, XLII. Veneziako Biurtekoan parte hartu zuen, Espainiako pabiloian, Ferrán García Sevilla, Cristina Iglesias eta José Maria Siciliarekin batera. 
Une hartatik aurrera, munduko leku askotan egin dira haren lanaren erakusketak, eta, horrekin batera, eskultura handiak jarri ditu espazio publikoetan.

2005. urtean, bere bilakaera artistikoaren ibilbidearen xehetasunak erakusten dituzten bostehun obra baino gehiago eman zizkion IVAMi –Arte Modernoko Valentziako Institutuari–. Erakunde horrek artistaren Katalogo Arrazoitua argitaratu zuen, 2015ean, non 1964. eta 2000. urteen bitartean egindako marrazkiak, pinturak eta argazkiak biltzen diren.

Miquel Navarro Mislatan bizi da gaur egun, eta bertan egiten du lan. 2016. urteaz geroztik, Mislatako Miquel Navarro biurtekoa antolatzen da herri horretan.

BISITA GIDATUAK

Doako ikustaldi gidatua larunbatero

18:30ean euskeraz

19:30etan gazteleraz

Ezinbestekoa da aurrez erreserba egita 943 012 400 telefonoan edo aretoan bertan

AUDIOGIDA ZERBITZUA

Miquel Navarro. Irudizko arkeologiak erakusketarekin batera audiogida zerbitzua lau hizkuntzetan (Euskera, gaztelera, inglesa eta frantsesa) aurkitu daiteke

3€ audiogida bakoitzeko

Indukzio magnetikoko begizta-zerbitzua ere badago audifona “T” (telebobina) posizioan erabiltzen dutenentzat

IKASTETXE ETA KOLEKTIBOENTZAKO JARDUERAK

Bisita gidatua

Iraupena: 60 min

Jardueraren kostua: 60€

Bisita-tailerra

Iraupena: 90 min

Jarduearen kostua: 80€

Jarduera guztietan gehienez 25 parte-hartzaile.

Jarduera hauez gain, edozein premia eta taldetara egokitutako jarduerak egin ditzazkegu

FAMILIENTZAKO TAILERRA

Familientzako tailerrak 5 eta11 urte bitarteko partaideentzat, lagunduta

Larunbatetan, 12:00etatik 13:30 arte

Prezio generala: 3€

Argibide eta erreserbetarako telefonoa: 943 012 400 edo This email address is being protected from spambots. You need JavaScript enabled to view it.

Larunbatetan erraldoi bihurtuko gara, hiri txikiak eraikitzeko. Guztiok elkarrekin tamaina askotako piezak ordenatzen eta desordenatzen jolastuko gara, eta pieza horiek kartoi, kortxo, plastiko, zur edo plastilinazkoak izan daitezke. Eta horrela, Miquel Navarrok egiten duen bezala, hiriak pentsatu eta egingo ditugu, gure tailer edo lantegian bakarrik posible izango direnak.

ERAKUSKETAREN KATALOGOA
 

Miquel Navarro. Irudizko arkeologiak

Egileak: 
 

Alberto Ferrer García
Dolores Durán Úcar

Hizkuntzak: euskara, gaztelera, inglesa eta frantsesa

Orrialde-kop.: 112

Argitaratze urtea: 2017

ISBN:978-84-7173-589-8
 

Salneurria: 25 € (BEZa barne)